9514

Навальнийни уйи олдида қўлга олишди

Россия кунида мамлакатда коррупцияга қарши ўтказилаётган намойишлар вақтида, тадбирларнинг асосий ташкилотчиси, мухолифатчи Алексей Навальний Москвадаги Тверь кўчасидаги ўз уйи олдида қўлга олинди. Бу ҳақида сиёсатчининг рафиқаси Юлия твиттерида маълум қилган.

«Алексейни подъезд олдида қўлга олишди. У шуни етказиб қўйишни сўради, режалар ўзгармайди: Тверская», — деб ёзган Навальнийнинг рафиқаси.

Навальнийнинг твиттерига жойланган суратда кўриш мумкинки, уни қўлга олиш учун камида 8 нафар полициячи 2та машинада уй олдига етиб келган.

Навальний бир кун олдин ўз сайтида 12 июнь куни, Россия кунида ўз тарафдорларини Тверский кўчасида тинч намойиш учун тўпланишга чақирганди. Москва ҳокимияти Сахарова проспектида митинг ўтказишга рухсат берганди, аммо сиёсатчининг сўзларига кўра, у бу ҳудудга саҳна ва овозкучайтиргичлар ўрнатишга улгурмаган. Шундан сўнг намойиш жойи Тверский кўчасига кўчирилганди.