Сеул судида Жанубий Кореянинг импичмент орқали вазифасидан туширилган собиқ президенти Пак Кин Ҳенинг коррупцияга алоқадорлиги бўйича дастлабки суд муҳокамаси бўлиб ўтмоқда, дея хабар беради Ёнҳап агентлиги.

Сеул Марказий округ судида бўлиб ўтаётган тарихий суд мажлисига собиқ президент қўллари кишанланган ҳолда келтирилган. Пак Кин Ҳе 31 март куни ҳибсга олингандан бери биринчи марта омма олдида кўриниш берган. Собиқ президент 10 март куни Конституциявий суд қарори билан ҳокимиятдан маҳрум қилинган эди.

Пак Кин Ҳега нисбатан порахўрлик, ваколатини суиистеъмол қилиш, куч ишлатиш ва давлат сирларини ошкор қилишдан иборат 18 та жиноят бўйича айблов эълон қилинган. Собиқ президентга қўйилган айбловлардан энг каттаси Жанубий Кореянинг учта йирик корпорациялари – Samsung, Lotte​ ва SK​ ширкатларидан 52 миллион долларлик пора олиш бўлиб, бунинг учун 10 йилдан умрбод озодликдан маҳрум қилишгача бўлган жазо тайинланиши мумкин.

Пак Кин Ҳе, шунингдек, уни танқид қилган айрим санъаткорларнинг фаолиятига тақиқ қўйиш ва компанияларни дугонаси Чой Сун Шилнинг жамғармаларига хайрия қилишга мажбурлашда ҳам айбланмоқда. Прокурорлар собиқ президент маҳаллий фирмаларга дугонасининг компаниялари билан шартномалар тузишлари учун босим ўтказганликда ҳам гумон қилишмоқда.

Ўз навбатида, Пак Кин Ҳенинг адвокатлари унга нисбатан эълон қилинган айбловларни инкор қилишган. Пак Кин Ҳе корруцион айбловлар билан жиноий иш очилган Жанубий Корея тарихидаги учинчи президент бўлди. Бундан аввал собиқ президентлар Чон Ду Ҳван (1980-1988) ва Но Тҳе У (1988-1993) коррупция ва давлатга хиёнатда айбланган. Чон Ду Ҳван умрбод, Но Тҳе У бўлса 22 ярим йилга озодликдан маҳрум қилинган. Аммо кейинги президент Ким Ёнг Сам 1997 йилда уларни афв қилган.

Жанубий Кореяда 9 май куни президентлик сайлови бўлиб ўтди. 2012 йилги сайловда Пак Кин Ҳега мағлуб бўлган ва ўтган йилнинг октябрь ойида бошланган коррупцион можароларда президентнинг истеъфосини талаб қилган намойишчиларга бош бўлган мухолиф партия раҳбари Мун Же Ин Жанубий Кореянинг янги президенти бўлди.