5262

Трамп Жанубий Кореядан бир миллиард доллар талаб қилди

АҚШ президенти Сонгжу вилоятида жойлаштирилган THAAD ракетага қарши мудофаа тизими учун Жанубий Кореядан пул ундириш ниятида. Yonhap агентлиги хабар беришича, Доналд Трамп АҚШ ва Жанубий Корея ўртасидаги савдо битимини бекор қилиш билан таҳдид қилган.

АҚШ президенти бу ҳақида пайшанба куни Рейтерс мухбирига берган интервьюсида гапирган. Унинг айтишича, ракета ҳужумига қарши мудофаа тизимлари учун Жанубий Корея 1 миллиард доллар товон тўлаши керак. Жанубий Корея чоршанба куни Шимолий Корея ракеталаридан ҳимоя қилиш мақсадида THAADнинг асосий ускуналари белгиланган жойга ўрнатилгани ҳақида эълон қилган эди.

Мазкур ҳодиса Жанубий Корея президенти бўлиш учун кураш олиб бораётган номзодларнинг асосий муҳокама мавзусига айланган. Демократик партия номзоди Мун Же Ин сайловда ғалаба қозонган тақдирда, ракета ҳужумидан мудофаа тизимлари масаласини қайта кўриб чиқилишини маълум қилган.

Мун Же Иннинг ташқи сиёсат бўйича маслаҳатчиси Ким Ки Жонг АҚШ президентининг сўзларига изоҳ берар экан, Жанубий Корея THAAD учун пул тўлаши имконсиз эканлигини айтган.

Бундан ташқари, Доналд Трамп Жанубий Корея ва АҚШ ўртасида 2007 йилда имзоланган ва 2010 йилда қайта ўзгартирилган эркин савдо тўғрисидаги келишувни қайта кўриб чиқиш ёки бутунлай бекор қилиш лозимлигини ҳам айтган.

АҚШ президенти фойдасиз келишув учун собиқ рақиби Ҳиллари Клинтонни айблаган. Маълумот учун, икка давлат ўртасидаги сўнгги савдо битими имзоланганда Ҳиллари Клинтон АҚШ давлат котиби лавозимида ишлаган эди.

ASR.UZ нинг TELEGRAMдаги каналига қўшилинг ва сўнгги янгиликларни ўтказиб юборманг