18618

Кафолатсиз маиший электротехника билан савдо қилганлик учун жазо берилади

Вазирлар Маҳкамасининг «Узоқ муддат фойдаланиладиган маиший электротехника товарларига техник хизмат кўрсатиш қоидаларини тасдиқлаш тўғрисида»ги қарори лойиҳаси ҚХТБТ порталида жойлаштирилди. Бу ҳақида Norma.uz шундай хабар берди.

1.04.2018 йилдан бошлаб ишлаб чиқарувчилар, импорт қилувчилар, улгуржи ва чакана сотувчилар томонидан узоқ муддат фойдаланиладиган маиший электротехникани техник хизмат кўрсатиш учун кафолат талонини мажбурий расмийлаштириш билан сотилишини ўрнатиш таклиф қилинмоқда. Талон қуйидагиларни ўз ичига олади:

•  маҳсулот номи ва модели;
•  ишлаб чиқарувчининг номи ва унинг юридик манзили;
•  узоқ муддат фойдаланиладиган товарнинг серия рақами;
•  кафолат шартлари ва муддати;
•  талондан фойдаланиш тартиби.

Изоҳ: Маиший электротехника товарларининг лойиҳа рўйхати ТИФ ТН кодлари кўрсатилган ҳолда 20 та позицияни ўз ичига олади. Улар орасида ошхона техникаси, аудио ва видеоаппаратура, мобиль ва ўтказиладиган телефонлар, иситиш ускунаси ва ҳоказо.

Кафолатли техник хизмат кўрсатиш ишлаб чиқарувчиларнинг ўзи ёки «Ўзстандарт» агентлигининг аттестациядан ўтган ва махсус рўйхатга киритилган марказлари  томонидан амалга оширилади. Агар товарга кафолатли хизмат кўрсатиш аттестациядан ўтган марказ томонидан амалга оширилса, ишлаб чиқарувчилар, импорт қилувчилар ва сотувчилар у билан тегишли хизматларни кўрсатиш бўйича шартнома тузади ҳамда марказларни эҳтиёт қисмларнинг кафолатли фонди билан таъминлайди. Бундай шартномани тузиш мажбурий бўлади.

Кафолатли техник хизмат кўрсатиш Тошкент шаҳрида, вилоятлар марказларида ва Қорақалпоғистонда ташкил этилиши керак. Габаритли ёки белгиланган товарлар (умумий оғирлиги 5 кг ва ундан ортиқ, габарити 50х35 см ва ҳоказо) бўйича у товар жойлашган жойга бориб хизмат кўрсатиши шарт.

Техник хизмат кўрсатиш муддати 72 соатни ташкил этади. Эҳтиёт қисмлар мавжуд бўлмаган ҳолатда у кафолатнинг амал қилиш муддатини тегишли равишда узайтириш билан 30 кунгача узайтирилиши мумкин.

Узоқ муддат фойдаланиладиган маиший электротехника товарлари билан кафолат талонисиз улгуржи ёки чакана савдони амалга ошириш айбдор шахсларни қонунчиликда кўзда тутилган жавобгарликка тортиш билан савдо қоидаларини бузишга тенглаштирилади (МЖтК 164-моддаси бўйича ЭКИҲнинг 15 бараваригача жарима, ЖКнинг 189-моддаси бўйича 2 йилгача ахлоқ тузатиш ишлари).

Лойиҳа  ўзгартирилиши, қўшимчалар киритилиши ёки рад этилиши мумкин.