18235

Алишер Саъдуллаев 3 кун ичида еттита вилоятда семинар ўтказди

Халқ таълими вазири ўринбосари Алишер Саъдуллаев ўз жамоасига энг сара ёш етакчиларни жалб қилиш мақсадида Самарқанд шаҳрида ёшлар етакчилари билан учрашиб, ўқув-семинар тренинг ўтказди.

Энг ёш вазир ўринбосари сифатида кўп тилга олинадиган Саъдуллаев машғулотни Ўзбекистон президенти Шавкат Мирзиёевнинг БМТда сўзлаган нутқи ҳақида ахборот беришдан бошлади. Саъдуллаев президент БМТ минбарида туриб ҳам ёшлар ҳақида қайғуриш билан тилга олганини, мамлакатда ёш авлод учун яратилаётган шарт-шароитлар ҳақида гапирганини эътироф этиб ўтди.

Президент бизга жуда катта имкониятлар берди, у киши биз, ёшларга, ишонди, ишонч эса — бу катта қарз, буни унутмаслигимиз керак, деб таъкидлади тренинг давомида Саъдуллаев.

Сўнгра президент топшириғига кўра ёшлар таклифларини ўрганаётганини маълум қилди. Самарқанд — Саъдуллаев 3 кун ичида ташриф буюраётган еттинчи вилоят бўлди.

Халқ вазири ўринбосари ёш етакчиларни маърифатсизликка қарши курашишга чорлади. Уларга боланинг ичига кириб, у билан дилдан суҳбатлашишни маслаҳат берди ва «Болага журнал беринг, кўрасиз, шу биргина журнал орқали унинг дунёқараши шу бугуноқ ўзгариши мумкин», — деди.

Семинар давомида вазир ўринбосари ўз шахсий тажрибасидан кўплаб мисоллар келтирди.

Саъдуллаев етакчилар ёшларни ўз ортидан эргаштира оладиган даражада бўлиши кераклигига алохида эътибор қаратди.