Қозоғистоннинг Чимкент шаҳридаги автомобилларга мўлжалланган жарима майдончасида кучли ёнғин содир бўлиши оқибатида 45 та транспорт воситаси ёниб кетган, дея хабар берди Tengrinews.
Фавқулодда вазиятлар идорасининг маълум қилишича, аввалига КамАЗ русумидаги машина ёниб, ундаги олов бошқа автомобилларга, сўнгра икки қаватли мебель цехига ўтган. Ёнғин 15 июль куни содир бўлган.
Тунги ёнғин икки соат мобайнида 76 ўт ўчирувчи ва 17 та ихтисослаштирилган техника ёрдамида бартараф этилди.
Бироқ ўтган вақт ичида утилизацияга мўлжалланган 35 та ва ҳайдовчилари жаримага тортилган 10 та автомобиль ёниб бўлган эди.
Ёнғин майдони 294 квадрат метрни ташкил қилди. Қурбонлар ва жабрланганлар йўқ.