38125

2018 йилнинг дастлабки чорагида алоқа сифати устидан шикоятлар 1,5 мингдан ошди

4 май куни Ахборот технологиялари ва коммуникацияларини ривожлантириш вазири Азим Аҳмадхўжаев мобил алоқа операторлари ва интернет-провайдерлари билан давра суҳбати ўтказди. Тадбирда алоқа, ахборотлаштириш ва телекоммуникация хизматлари сифатини яхшилаш масалалари муҳокама этилди. Бу ҳақда вазирлик ахборот хизмати хабар бермоқда.Давра суҳбатида давлат раҳбари томонидан жорий йилда интернет тезлигини 8—10 баробарга ошириш вазифа этиб топширилгани алоҳида таъкидланди. Мазкур вазифанинг ижросини таъминлаш учун қонунчиликни такомиллаштиришдан тортиб соҳага йирик инвестицияларни жалб этишгача бўлган комплекс масалаларни ҳал этиш лозим. Айни пайтда лицензиялаштириш, рухсатномалар бериш ва бошқа кўплаб жараёнларни соддалаштириш устида кенг кўламли ишлар олиб борилмоқда.

Таъкидланишича, алоқа сифати устидан шикоятлар борган сари ўсиб бормоқда. Биргина 2018 йилнинг дастлабки чорагида ана шундай мурожаатлар сони 1,5 мингдан ошиб кетди. Статистик таҳлиллар мурожаатларнинг аксарияти қуйидаги соҳаларга оид бўлаётганини кўрсатмоқда: интернет хизматлари — 349 та мурожаат (22 %), турғун алоқа — 272 та мурожаат (17 %), мобил алоқа — 275 та мурожаат (17 %), почта алоқаси — 153 та мурожаат (10 %) ва телерадиодастурлар — 77 та мурожаат (5 %).

Шу йилнинг 7 март куни Ўзбекистон Республикас Вазирлар Маҳкамасининг «Алоқа, ахборотлаштириш ва телекоммуникация хизматлари сифатини янада яхшилашга доир чора-тадбирлар тўғрисида»ги қарори қабул қилинди. Ушбу қарор билан, шу жумладан, «Қонунчилик ва бошқа норматив ҳужжатлар, давлат стандартлари талаблари ҳамда алоқа, ахборотлаштириш ва телекоммуникация технологиялари соҳасида кўрсатилаётган хизматлар сифати бузилганлиги учун молиявий санкциялар (жарималар)ни ҳисоблаш тартиби тўғрисида»ги низом ҳам тасдиқланди ва у 2018 йил 1 июндан бошлаб кучга киради.

Низом Ахборот технологиялари ва коммуникацияларини ривожлантириш вазирлиги ҳузуридаги Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси томонидан UNICON.UZ Давлат унитар корхонаси билан биргаликда ишлаб чиқилган бўлиб, у телекоммуникациялар соҳасида хизматлар кўрсатиш бўйича норматив ҳужжатлар талабларини бузганлик учун молиявий санкциялар (жарималар) қўллаш ва давлат назорати тизимини такомиллаштириш, телекоммуникация тармоқларининг ишончли барқарор, узлуксиз ишлаб туриши имконини беради. Шунингдек, алоқа, ахборотлаштириш ва телекоммуникация технологиялари соҳасида хизматларни ўз вақтида ва сифатли тақдим этиш борасида истеъмолчилар ҳуқуқлари ҳимоясини таъминлайди.

Мавзкур низом мулкчилик шакли ва идоравий мансублигидан қатъи назар алоқа, ахборотлаштириш ва телекоммуникация технологиялари соҳасида фаолият кўрсатаётган хўжалик юритувчи субъектларга тарқатилади.

Давра суҳбати давомида операторларга алоқа бозоридаги муаммоларни кун тартибига киритиш, мобил алоқа операторлари ва интернет-провайдерлар фаолиятида учрайдиган бюрократик тўсиқлар ҳақида сўзлаб бериш имконияти тақдим этилди.

Худди шундай учрашувларни доимий равишда ўтказиш келишиб олинди.