24089

Жанжал: Араш концерти бекор бўлгани туфайли ўзбек продюсери у билан судлашмоқчи

Nigora Media Group продюсерлик компанияси раҳбари Нигора Соим хонанда Арашни судга бериш учун ҳамма ҳужжатлари тайёр эканлигини маълум қилди. Унинг сўзларига кўра, хонанданинг концерти бекор қилингани сабабли продюсер 50 минг доллар миқдорида зарар кўрган, дея хабар қилди Repost.uz

Шартномага кўра, Арашга гонорарнинг 50 фоизини олдиндан тўлаб берганман, менда буни тасдиқловчи ҳужжатлар мавжуд. Бундан ташқари, унинг 11 нафар жамоа аъзоларига чипталар жўнатганман, бу чипталар ҳозирда менда турибди. Бироқ, шунга қарамасдан, Араш келмади. Концертни бекор қилди. Мен томошабинларга концерт чипталари учун сарф этилган пулларни қайтариб беришга мажбур бўлдим. Натижада, мен 50 минг доллар атрофида зиён кўрдим. Айни дамда менинг қўлимда хонанда Арашга қарши судга бериш учун барча ҳужжатлар мавжуд, у менга келтирган зарарни қоплаши зарур”, деб айтади Нигора Соим.

Эслатиб ўтамиз, Арашнинг концерти Тошкент шаҳрида 13 октябрь куни бўлиб ўтиши керак эди, кейинчалик эса концерт 31 октябрга кўчирилди. Бироқ, бир кун қолганда Араш Ўзбекистонга келишдан бош тортди ва буни у ўзбек ташкилотчиларини ўзларининг мажбуриятларини бажармаганликлари билан изоҳлади.

“Улар бизга ваъда қилинган гонорарни тўлиқ тўлаб беришмади. Шу сабаб ҳам биз концертни бекор қилдик. Бизнинг гуруҳ Тошкентга 28 октябрь куни учиб келиши керак эди. Агарда бизга тўлиқ ҳақ тўланмаган тақдирда, биз жамоамиз аъзоларига бу мамлакатга боришга рухсат бермаймиз”, дейди хонанданинг продюсери.