13295

Ўзбекистон 2018 йил якунида рақамли телеузатишга тўлиқ ўтади

2017 йилнинг охирига қадар Ўзбекистоннинг барча ҳудудлари ер усти рақамли телеузатиш билан таъминланади. Бу ҳақида жорий йилнинг 17 июль куни Вазирлар Маҳкамаси томонидан қабул қилинган «Рақамли телеузатишга ўтиш ва ер усти муқобил телеузатишни тўхтатиш чора-тадбирлари тўғрисида»ги 502-сонли қарорида маълум қилинган.

Муқобил телеузатмаларни тўхтатиш босқичма-босқич амалга оширилади. Бунинг учун Вазирлар Маҳкамаси томонидан махсус жадвал тасдиқланган. Унга асосан муқобил телеузатиш Тошкент шаҳрида 2018 йил 15 июлгача, бутун Республика бўйича эса 2018 йил 5 декабрда тўхтатилади.
Ҳозирги кунда рақамли телеузатишга ўтишга енгил ўтиш учун биринчи бепул ва ҳаммабоп бўлган рақамли телеканаллар тўплами (мультиплекс) шаклланган. Ҳозирги кунда ушбу тўплам Миллий телерадиокомпания таркибига кирувчи 13 та канални ўз ичига олади. Булар: «Ўзбекистон», «Ёшлар», «Спорт», «Кинотеатр», UZ HD ва бошқалар. Шунингдек, унинг таркибига 7 та ҳусусий телеканаллар — Mening Yurtim, Caravan TV, UzReport TV, Zo’r TV HD, FUTBOL TV, Milliy TV, Zo’r TV киради.
Масаланинг техник томонига келадиган бўлсак, қарорда 2017 йил якунига қадар республиканинг барча аҳоли яшаш пунктлари рақамли телеузатмалар учун зарур 90 комплект катта ва 404 комплект кичик қувватли ускуналар билан қоплаш ҳақида Ахборот технологиялар ва коммуникацияларини ривожлантириш вазирлигига топшириқ берилди.

«Муқобил телеузатишларни тўхтатиш енгил ўтади. Масалан, аҳолининг эҳтиёжманд қисмлари ва нафақахўрларга рақамли телевидение хизматларидан фойдаланиш учун керакли ускуналар, жумладан, телевизорлар, приставкалар ва бошқаларни харид қилиш учун имтиёзли истеъмол кредитларини тақдим этишни кенгайтириш тавсия этилади»

Бундан ташқари, рақамли телеузатиш хизматларга фойдаланиш учун кенг имкониятлар бериш мақсадида хорижий сунъий йўлдош алоқа сегментини ижарага олиш бўйича маблағлар ажратилади.