46392

Тошкент пропискаси учун тайёрланган ҳужжатлар қалбаки эканлиги аниқланди

Олмазор туманида ҳужжатларни қалбакилаштириш жинояти бўйича тергов олиб борилмоқда. Бу ҳақида Тошкент шаҳар ИИББ матбуот хизмати хабар берди.

22 август куни 28 ёшли А.Олимжон Тошкент шаҳрига доимий рўйхатга ўтиш учун ички ишлар органларига мурожаат қилган.

Кейинчалик аниқлик киритилишича, у бунинг учун Соғлиқни сақлаш вазирлиги номидан илтимоснома, 1-сонли Интернат уйи номидан маълумотнома ва буйруқларга имзо ҳамда муҳрларни қалбакилаштириб, тақдим қилган экан.

Ҳозирда ушбу ҳолат юзасидан Ўзбекистон Республикаси Жиноят Кодексининг 228 моддаси (“Ҳужжатлар, муҳрларни қалбакилаштириш”) билан жиноят иши қўзғатилиб, тергов ҳаракатлари олиб борилмоқда.