44903

Маҳкумлар ҳали озодликка чиқмасдан меҳнат дафтарчаси очилиб, иш билан таъминланади

Озодликдан маҳрум этиш жойларидан озод қилинган шахсларнинг ижтимоий ҳимоя қилинишини ташкил этиш ва таъминлаш, тегишли тартибда кийим-кечак, озиқ-овқат ва турар жой учун бир марталик тўланадиган нафақа пули берилади. Бу ҳукумат қарорида кўзда тутилган.

Ҳужжат республика миллий қонунчилик базасида эълон қилинди.

Қарорга мувофиқ, ушбу йўналишдаги ишларни амалга ошириш бўйича 2018-2022 йилларга мўлжалланган “Йўл харитаси” тасдиқланди.

2019 йил 1 январдан бошлаб жазони ижро этиш муассасаларида тўлиқ ижтимоий мослаштириш мақсадида маҳкумларни тизимли ўрганиш ва уларнинг онгини ўзгартиришга қаратилган тарбиявий ишларнинг ягона комплекс тизими жорий этилади.

Қарор билан, шунингдек, озодликдан маҳрум этиш жойларидан озод қилинган шахсларни реабилитация қилиш ва ижтимоий мослаштириш марказлари ташкил этилади.

Қарорга мувофиқ, маҳкумларга шахсий ҳужжатларни тиклаш ва паспорт олишда ёрдам кўрсатилади, уларнинг пенсия суғуртаси, меҳнат дафтарчасини расмийлаштириш шахс жазони ижро этиш муассасаларидан озод қилингунга қадар амалга оширилади.

Маълумотларга кўра, кейинги 15 йил давомида республикада маҳбуслар сони икки баравардан кўпроққа камайган.