36555

Бош прокуратура: Биринчи чоракда 66 мингга яқин фуқоролар мурожаат қилди

Жисмоний ва юридик шахсларнинг мурожаатларини қонунда белгиланган муддат ва тартибда кўриб чиқиш, фуқароларнинг муаммоларини амалда ҳал этиш прокуратура органларининг устувор вазифаларидан бири ҳисобланади.

Айниқса, фуқароларни шахсан қабул қилиш – кўплаб муаммоларни бевосита жойида ҳал этиш, турли суиистеъмолчилик ва бошқа қонунбузилиши ҳолатларига нисбатан тезкорлик билан муносабат билдириш, умуман, аҳолининг оғирини енгил қилиш имкониятини бермоқда.

2018 йилнинг 1-чорагида прокуратура органларига келиб тушган мурожаатлардан 72.292 таси ҳал этилиб, фуқароларнинг бузилган ҳуқуқлари тикланиши таъминланди.

Прокуратура органлари ходимлари томонидан 65.855 нафар, шундан, бевосита Бош прокуратура раҳбарияти томонидан 634 нафар фуқаролар қабул қилинди. Бу ҳақида Бош прокуратура матбуот хизмати хабар берди.
Шу билан бирга, ҳудудларга чиқиб фуқароларни сайёр қабул қилишга ҳам алоҳида эътибор қаратилмоқда.

Жумладан, Қорақалпоғистон Республикаси, Фарғона ва Хоразм вилоятларида ташкил этилган сайёр қабуллар давомида Бош прокурор томонидан 291 нафар фуқаролар қабул қилиниб, уларнинг узоқ вақтдан буён ечимини топмай келаётган турли муаммолари ҳал этилиши таъминланди.

Хусусан, қабуллар натижасида 24 нафар шахслар иш билан таъминланди, фаолиятни ташкил этиш ёки янада ривожлантириш ва шу асосда қўшимча иш ўрни яратиш учун 38,2 гектар ер майдони, 2,8 млрд. сўм кредит маблағи ва зарур техника воситалари ажратилди.

Шунингдек, 2 нафар шахс уй билан, 8 нафар шахс ногиронлик аравачаси билан таъминланди, 5 нафар фуқарога уй-жой ажратилиши учун ҳужжатлар расмийлаштирилди, қарздорлардан 281 млн. сўм ундирилди, 4 та маҳалла фуқаролар йиғинида электр трансформаторлар ўрнатилиб, 2.300 метр электр линияси ва 255 метр сув тармоғи тортилди.

Қўпол қонунбузилиши ҳолатлари бўйича 3 та жиноят иши қўзғатилди.

Масалан, Б.Тожиевнинг мурожаати бўйича ўтказилган текширишда, Қўқон шаҳар давлат солиқ инспекцияси ходимлари маълумотларни сохталаштириб, «Oqjar porloq kelajagi» МЧЖда текшириш уюштирганликлари аниқланиб, жиноят иши қўзғатилди.

Бундан ташқари, Бош прокуратура томонидан жисмоний ва юридик шахсларнинг мурожаатларини бевосита қуйи прокуратура органларида ҳамда бошқа давлат идораларида ҳал этилиши устидан ҳам тизимли назорат ўрнатилган.