32622

Энди судланганлар ишга киришда қийналмайди

Қонунчилик палатаси ялпи мажлиси ҳақида берилган хабарда, энди судланганлик ишга киришда тўсиқ бўлмаслиги ҳақида айтилди. Қонун қабул қилиндими? Бу бўйича нима янгиликлар бор?

Кўп йиллардан буён амалиётда давлат идораларига ишга кирмоқчи бўлган шахслар яқин қариндошлари ёки ўзининг судланганлиги муносабати билан ишга киришда тўсиққа учраб келганлиги ҳеч кимга сир эмас.

Конституцияда, Меҳнат кодекси ва бошқа қонунларда ҳар бир шахс меҳнат қилиш, эркин касб танлаш, адолатли меҳнат шароитларида ишлаш ва қонунда кўрсатилган тартибда ишсизликдан ҳимояланиш ҳуқуқига эгалиги, ҳамда меҳнатга оид муносабатларда камситишнинг тақиқланиши белгиланган.

Бироқ, амалдаги қонунчиликда шахснинг ўзини ёки яқин қариндошларини муқаддам судланганлиги муносабати билан ишга қабул қилишни рад этилиши тартиблари аниқ белгиланмаганлиги, фуқароларнинг меҳнат қилиш ва эркин касб танлаш ҳуқуқини тўлиқ амалга оширилишига тўсқинлик қилмоқда.

Фуқаролардан тушаётган мурожаатлар таҳлилига кўра Адлия вазирлиги томонидан тайёрланган “Ўзбекистон Республикасининг Меҳнат кодексига қўшимча ва ўзгартиш киритиш ҳақида”ги Қонун лойиҳаси Ўзбекистон Республикаси Вазирлар Маҳкамаси томонидан Олий Мажлис Қонунчилик палатасига киритилган эди.

Адлия вазирлигининг Телеграмдаги «Ҳуқуқий ахборот» каналида хабар берилишича, ушбу қонун лойиҳаси 14 февраль куни ялпи мажлисда иккинчи ўқишда депутатлар томонидан маъқулланди.

Қонун лойиҳасида Меҳнат кодексига қўшимча ва ўзгартиш киритилиб, қонун ҳужжатларида назарда тутилганидан бошқа ҳолларда шахснинг муқаддам судланганлиги, ёҳуд яқин қариндошларининг судланганлиги муносабати билан ишга қабул қилишни рад этилишини таъқиқловчи нормани ўрнатиш назарда тутилган.

Ушбу қонуннинг қабул қилиниши фуқароларга ишга жойлашиш ва ўз салоҳиятини рўёбга чиқариш ҳамда меҳнат қилиш ҳуқуқларини амалга оширилишини таъминлайди.