29745

Ақтобедаги фожеа: автобусдаги ёнғинга қисқа туташув сабабмиди, ёки унга …

Кеча, 18 январь куни Оқтўба вилоятининг Иргиз туманида рўй берган фожиадан барчанинг хабари бор. «Икарус» русумли автобусда келиб чиққан ёнғин оқибатида 52 йўловчи тириклай ёниб кетди. Яна беш нафар киши жабрланган. Йўловчилар шахси аниқланмоқда. Улар орасида Ўзбекистон ҳамда Қозоғистон фуқаролари бўлган. Ҳайдовчи жон сақлаб қолган, аварияга қисқа туташув сабаб бўлган бўлиши мумкинлиги ҳақида сўзлаб берган. Юз берган ҳодиса юзасидан жиноий иш қўзғатилган. Шу кунларда барчанинг тилида бир савол: нима учун йўловчилар автобусдан чиқиб кета олишмаган? Бир қанча хорижий ОАВда тарқалган хабарларни биргаликда ўрганиб чиқамиз.

ОАВларда берилаётган хабарларга кўра, автобус ўт қўйиш ва ўз ишига совуққонлик билан қараш оқибатларида аварияга учраган.

Қозоғистондаги Самара-Чимкент трассасида «Икарус» русумидаги автобус ёниб кетган.

«Фожеада омон қолган беш нафар фуқароларга тиббий ёрдам кўрсатилмоқда», — деб хабар берган Қозоғистон ИИВ Фавқулодда вазиятлар қўмитаси матбуот-хизмати.

Жабрланганлар енгил куйиш жароҳатини олишган, деб изоҳ берган Ақтобе вилояти губернатори ўринбосари Серик Туленбергенов.

Муассаса маълумотларига кўра, ёнғин автобус ҳаракатланаётган вақтда юз берган. Бу вақтда транспорт Ақтўбе вилояти Иргиз тумани, Самара-Чимкент трассасининг 1068 километрида, Калибай посёлкасидан 10 км нарида бўлган.

Авария маҳаллий вақт билан 10:30да юз берган. Ҳодиса жойига полиция, қутқарувчилар, медиклар, руҳшунослар бўлинмалари етиб боришган. Бундан ташқари Ақтобе вилоятининг фавқулодда воқеалар бўйича департаменти тезкор штаб ташкил қилган. Юз берган ҳодиса муносабати билан «тезкор линия»лар ишга туширилди.

Ақтобе вилояти ФВ департаменти ёниб кетган автобус Жанубий Қозоғистоннинг Жибек жоли поселкасидан Қозонга йўл олган бўлганлиги ҳақида хабар берган.

Авария сабаблари
Ҳозирга қадар йўловчи автобус бортида аслида нима юз бергани ва ёнғин қай тарзда содир бўлгани тўғрисида расмий ахборот берилмади. Фавқулодда ҳодиса юзасидан жиноий иш қўзғатилган.

RT телеканали эса автобус ҳайдовчисининг берган кўрсатмаларини эълон қилди. Иргиз тумани ИИБ маълумотларига биноан, ҳайдовчи ушбу ёнғинда умуман жароҳатланмаган ягона киши.

«Ҳайдовчи соппа-соғ. У ёнғин бўлаётганди, тутун ҳидини сездим, тўхтадим ва эшикларни очдим. Бўлди. Беш дақиқа ўтди — ва автобус ёниб бўлди, ундан ҳеч вақо қолмади», — деб хабар қилган ИИБ ходими.
У шунингдек, ёнғин қисқа туташув туфайли юз берган бўлиши мумкинлигини билдирган.

«Туташув содир бўлганга ўхшайди. Аммо бу ҳайдовчи версияси. Ҳозирча суриштирув ишлари олиб борилмоқда», — қўшимча қилган муассаса ходими.

RT нашри хабарига кўра, тирик қолганлар ҳозирча шок ҳолатида. «Улар ҳатто гаплаша олмайди», — хотима қилган у.

Ақтобе вилоятида юз берган ҳодиса сабабларини ўрганиш учун ҳукумат муассасалараро махсус комиссия ташкил қилинган.

ОАВлар бу ўт қўйиш бўлиши мумкин, деган версияни илгари сурган. Ижтимоий тармоқ фойдаланувчилари, юз берган ҳодиса терактга ўхшашини айтишган.

Шунингдек, ёнғин ҳайдовчининг бепарволиги оқибатида юз берганлиги тўғрисида ҳам тахминлар мавжуд. Баъзи маълумотларга кўра, у ёзги соляркадан фойдаланган, сўнгра паялни лампа ёрдамида бакни иситмоқчи бўлган.

Қурбонлар фуқаролиги
Қозоғистон Республикаси Фавқулодда вазиятлар қўмитаси вакили Руслан Иманкулов Спутник Қозоғистон нашрига қурбонларнинг фуқаролиги аниқланаётганини маълум қилган.

«Фуқаролиги ўрнатилмоқда, лекин аниқ у ерда Ўзбекистон фуқаролари бўлган», — деган Иманкулов телефон орқали мулоқотда. У автобус Ўзбекистон билан чегарадош Жанубий-Қозоғистон вилоятида рўйхатга олинганини айтган.
Бу орада жабрланганлар исми-шарифи ҳам маълум бўлди.
Улар Ақтобега олиб борилди.

«Улар орасида уч нафари, яъни ҳайдовчилар Қозоғистон фуқаролари: Пернебек Максат, 1985 йилда туғилган, Кыргызбаев Нуржан, 1968 йилда туғилган, Танатаров Барат, 1978 йилда туғилган. Уларнинг барчаси Жанубий-Қозоғистон яшовчилари. Қолган икки нафари — Ўзбекистон фуқароси. Исаков Ахрор, 1988 йилда туғилган ва Мырзахметов Исроилжан, 1980 йилда туғилган», — деб изоҳ берилган муассасада.

Жабрланганларнинг жароҳати енгиллиги, уларга жойида биринчи ёрдам кўрсатилгани маълум қилинди.
Илгарироқ Ақтобе вилояти Фавқулодда вазиятлар департаментида ҳалок бўлганларнинг барчаси — Ўзбекистон фуқаролари эканлиги тўғрисида хабарлар тарқалган эди.

Автобус эшиклари ёпилиб қолгани учун ичкаридаги йўловчилар чиқиб кета олмагани ҳақида аввалроқ берилган тахминлар тасдиқланмади.

Қозоғистон полицияси маълумотига кўра, ушбу ҳолат юзасидан жиноий иш қўзғатилган.

«Табиийки, жиноят иши қўзғатилган. Ҳамма шу ерда  — прокуратура, ички ишлар департаменти, фавқулодда вазиятлар бўйича департамент, тиббиёт вакиллари ҳамда область губернатори ўринбосари раислигидаги комиссия — иш ўрганилмоқда.

Факт мамлакат ЖКнинг 345-моддаси 4-банди бўйича қайд этилди», дея таъкидлаган манба.

Мазкур модда йўл ҳаракати хавфсизлиги ёки транспорт эксплуатацияси қоидаларининг бузилиши оқибатида эҳтиётсизликдан одам ўлишини назарда тутади. Бу моддага кўра жавобгар беш йилдан ўн йилгача озодликдан маҳрум қилиниши мумкин.

«Биз 52 тобут ва транспорт тайёрлаб қўйдик. Қариндошлар, кўп эҳтимол билан, таниш жараёнига келмайди. Ёриш ишлари Ақтўбеда ўтказилади, сўнг жасадлар самолёт билан Ўзбекистонга юборилади ва таниш жараёни ўша ерда ўтказилади», дея Ақтўбе вилояти маъмурияти вакилининг сўзларини келтирган Tengrinews.kz.

Шунга ўхшаш ҳалокатлар
2017 йил декабр ойида Иргиз поселкасига яқин трассада Россиядан келаётган автобус бузилиб қолган. Салонда Ўзбекистоннинг 48 нафар фуқароси бўлган. Кўча температураси —23 С°гача тушган. Йўловчилар кўчада музлаб қолишлари мумкин эди. ФВ ходимлари уларга ёрдамга келишган. Ўзбекистон фуқаролари исиниш пунктларига олиб борилган.

2017 йилнинг 22 июнь куни Қозоғистоннинг Ақтўбе областида, «Самара-Чимкент» йўлининг 946-километрида салонида Ўзбекистоннинг 50 нафар фуқароси бўлган автобус ағдарилиб кетганди. Ҳодиса оқибатида ватанга қайтаётган 9 нафар ўзбекистонлик ҳалок бўлган, яна 17 киши турли даражада жароҳатланганди.

2017 йилнинг 6 октябрь куни тонгида эса Россиянинг Владимир областидаги темирйўл кесишмасида салонида Ўзбекистоннинг 55 нафар фуқароси бўлган автобусни поезд уриб кетди. Бу ҳодиса оқибатида 16 нафар ўзбекистонлик ҳалок бўлди. Бу ўзбекистонликлар ҳам Россиядан ватанга қайтаётган, аммо ета олмаганди.

Автобусда ҳаётдан кўз юмганлар ҳам Россияга моддий имконияти бўлмагани, поезд ёки самолёт чиптасига пули йўқлиги туфайли автобусда йўл олгани аниқ. Улар ўйнаш учун кетишмаётган эди. Аммо… 18 январь куни 50дан ортиқ ватандошимиз, акамиз, укамиз, яқинимиз фожиали тарзда ҳаёт билан, орзу-истаклари ва яхши ниятлари билан видолашди.

ASR.UZ таҳририяти аъзолари ҳам чуқур қайғу ва изтироб билан Ақтўбеда ҳалок бўлганларнинг оила аъзоларига ҳамдардлик билдириб, ватандошларнинг охиратлари обод бўлишини, Аллоҳ уларни раҳматига олишини сўраб дуо қилиб қолади!