Тошкент шаҳрида айни вақтда қоидабузарлик ҳолатларини автоматик равишда қайд этиб борувчи автомобил ҳаракати йўлга қўйилган. Тажриба сифатида синовдан ўтказилаётган бу автомобил ҳаракатланиш давомида автомобиллар рақамларини автоматик равишда сканер қилади ва уларни базага киритиб, автоулов сохиби жарима тўлови муддатини кечиктирган-кечиктирмаганлигини аниқлаш сингари ҳаракатларни амалга оширади.

Автомобилга ўрнатилган замонавий тизим, шунингдек, ўғирланган автомобилларни излаш билан ҳам шуғулланади. У ёнидан ўтиб кетаётган барча транспортларни қайд қилиш хусусиятига эга. Айнан мана шу автомобил туфайли бир ой давомида 129 миллион сўмлик жарима пулини ундиришга муваффақ бўлинган.

ЙҲХБ га қарашли бошқа автомобиллар ҳам шу каби тизим билан жиҳозланиши учун тайёргарлик кўрилмоқда.

Шунингдек, Ўзбекистонда видеорегистраторлардан фойдаланишни кенгайтириш йўналишида ҳам ишлар амалга оширилмоқда. Бу борада пойтахт милицияси Хитой тажрибасини ўрганаётгани таъкидланмоқда.

Йўл инспекторлари автомобиллари яқин келажакда видеорегистраторлар билан таъминланади ва бу билан машина ташқарисида ва ички қисмида содир бўлаётган воқеаларни ёзиб бориш имконияти туғилади. Яъни йўл инспекторлари ҳаракатлари тўлиқ видеорегистраторларга қайд этиб борилади.