14925

Ўзбекистон қонунларини қўпол равишда бузиб келаётган телеканаллар номи маълум қилинди

Кеча Ўзбекистон матбуот ва ахборот агентлиги томонидан “Босма ва электрон оммавий ахборот воситаларининг бугунги фаолияти ва истиқболдаги вазифалари” мавзуида матбуот анжумани ташкил этилди.

ЎзМАА тақдим этган анжуман Пресс-релизида қайд этилишича, айрим республика телерадиоканаллари фаолиятида қонунбузилиш ҳолатлари кузатиб келинмоқда. Хусусан, Сурхондарё вилоятидаги “Денов-АТР”, Бухоро вилоятидаги “Ғиждувон-ТВ”, Жиззах вилоятидаги “Жиззах ТВ2” телеканаллари, Андижон вилоятидаги “Дийдор ФМ” радиоканали, “Тараққиёт” телеканали фаолиятида Ўзбекистон Республикаси “Ахборот эркинлиги принциплари ва кафолатлари тўғрисида”ги Қонуни, “Журналистик фаолиятни ҳимоя қилиш тўғрисида”ги Қонуни 6-моддаси, “Оммавий ахборот воситалари тўғрисида”ги Қонуни 5-моддаси доимий қўпол равишда бузиб келинган, деб ёзмоқда Uz24.uz

Номлари келтирилган теле ва радиоканаллар сўнгги йиллар давомида, шунингдек, “Ўзбекистон Республикасида ёшларга оид давлат сиёсатининг асослари тўғрисида”ги Қонунни қайта-қайта қўпол равишда бузиб келишган. Агентлик томонидан уларга огоҳлантиришлар, тақдимномалар юборилган. Лекин булар кор қилмасдан, ёшларга, менталитетимизга зид бўлган рақсбоп тарона-ю, кўнгилочар фильмларни қўйиб эшиттириш, бўш вақтини мазмунли ўтказиш ниқоби остида маданиятсизликни тарғиб қилиш, шаҳвоний туйғуларга эрк бериш каби ҳолатлар давом этган.