15399

Шавкат Мирзиёев ОВИРни бекор қилиб, хорижга чиқиш паспорти жорий қилиш ҳақидаги қарорни имзолади

Шавкат Мирзиёев 2019 йилнинг  1 январидан бошлаб чиқиш стикерларини бекор қилиш ва хорижга чиқиш паспорти жорий қилиш ҳақидаги қарорни имзолади.

Ушбу йилнинг феврал ойида Шавкат  Мирзиёев вазирлик ва муассасаларга Ўзбекистон паспорт-виза ҳамда кириш-чиқиш тизимини мукаммалаштирувчи чоралар ишлаб чиқишни топширган эди. Хусусан, 1995 йилдан бери амал қилаётган, хорижга чиқиш стикерларини бекор қилиб чет элга чиқиш учун алоҳида паспорт жорий қилиш тизимини киритиш режалаштирилган эди.

“Вазирлар Маҳкамаси ҳузуридаги Давлат персоналлаштириш марказининг 2019 йилнинг 1 январидан бошлаб Ўзбекистон фуқаросининг чет элга чиқиш биометрик паспортини жорий қилиш ҳақидаги таклифи маъқуллансин”, — дейилган президент қарорида.

Ушбу қарор, шунингдек, 2019 йилнинг биринчи январидан бошлаб чет элга чиқишга рухсат берувчи стикер бериш тартибини бекор қилади.

Қарорда айтилишига кўра, 2011 йилда киритилган ва бугунги кунда амал қилаётган Ўзбекистон фуқаросининг биометрик паспорти, Ўзбекистон ҳудудида фуқаро шахсини аниқловчи ҳужжат сифатида қабул қилинади.

Фуқаролар 2021 йилнинг 1 январига қадар, виза талаб қилинмайдиган мамлакатлар ҳудудига, бугунги кунда амал қилаётган (яшил) паспорт билан боришлари мумкин.