32439

Ақтўбедаги фожиа қурбонларининг оилалари учун ташкил қилинган хайрия акциясида йиғилган эҳсонлар эгаларига етказилади

Ўзбекистон 21 февраль 13:09 1 557

Қозоғистондаги фожиада ҳалок бўлган ўзбекистонликларнинг оилаларига моддий кўмак бериш мақсадида ташкил қилинган хайрия акциясида жами 330 миллион сўмга яқин маблағ йиғилди. Бу ҳақида акция ташкилотчиларидан бири блогер Хушнудбек Худайбердиев маълум қилди.

Йиғилган сумма 52 га тенг тақсимланди ҳамда ҳар бир ҳалок бўлган ўзбекистонликнинг оиласига 6 миллион 300 минг сўмдан эҳсон қилинадиган бўлди.

1-босқичда Наманган вилоятидан ҳалок бўлган 31 кишининг оилаларига пуллар тақсимланди ва эрта-индин мазкур эҳсонлар эгаларига етказилади.

2-босқичда PayPal ҳамда GoFundMe платформаси орқали тушган пуллар ташкилотчилар қўлига етиб келгандан сўнг, қолганларга ҳам етказиш чора-тадбирлари кўрилади.

Блогер хайрия акциясини ташкил қилишда яқиндан ёрдам берган барча кишиларга, маҳаллий ҳокимият вакилларига, «Алоқабанк» масъулларига, лойиҳани қўллаб-қувватлаганларга ҳамда энг асосийси озми-кўпми эҳсон қилган саховатпеша инсонларга чексиз миннатдорлик билдириб қолди.

Изоҳ билдириш