Ижтимоий тармоқларда Тошкент метрополитени «Юнусобод» йўлининг давомини қуриш ишлари вақтида юз берган авария оқибатида ҳалок бўлган икки ишчининг қариндоши мурожаати тарқалди. Айни вақтда Россияда меҳнат муҳожирлигида бўлган фуқаро Юнусободдаги фожиа оқибатида икки тоғаваччаси ҳалок бўлганини таъкидлаган.
Мен Жамшид Пардаевман, айни пайтда Россияда меҳнат миграциясидаман. 1983 йил Яккабоғ туманида туғилганман. Онам Шаҳрисабз туманининг собиқ Амир Темур жамоа хўжалиги Бешкапа қишлоғидан.
Метронинг «Юнусобод» йўли қурилишида икки тоғамнинг фарзандлари вафот этишди. Улар Бешкапа қишлоғида яшар эди. Айрим каналларда ҳалок бўлган Абдуллаевлар қариндош эмас, деб ёзишган экан. Лекин улар қариндош эди. Ака-укаларнинг фарзандлари эди. Онам метро қурилишида вафот этган жиянларим Ойбек ва Давронбекларнинг аммаси бўлади.
1989 йилда туғилган Ойбек Абдуллаев катта — Тўра тоғамнинг ўғли. Уйланган, фарзандлари бор эди. 1999 йилда туғилган Давронбек Абдуллаев кичкина — Ботир тоғамнинг ўғли эди. У ҳали бўйдоқ эди. Ботир тоғамни июнда қабрга қўйган эдик. Бугун унинг ўзини ҳам қабрга қўйишибди. Мен Россиядаман, афсуски етиб бора олмадим.
20 ёшли Давронбек отасининг йил ошини ўтказишга яқинда Россиядан кетган эди. Ўша жиянларимни қурилиш ишларига расман жалб этишганми ёки мардикор бозордан олиб кетишганми, буни ҳам аниқлаб айтаман. Уйим билан боғлана олмаяпман. Сингилларим ҳам телефонга жавоб бермаяпти. Айтишларича, онамнинг мазаси бўлмай қолган, касалхонага олиб кетишган, деб эшитаяпман.
Жамшид Пардаев, Юнусободдаги фожиада ҳалок бўлган Ойбек ва Давронбек Абдуллаевларнинг тоғаваччаси
Аввалроқ, Юнусободдаги метро қурилиши вақтида юз берган авариядан сўнг олти кишининг жасади тупроқ остидан олиб чиқилгани, уларнинг уч нафари бир қишлоқдан — Қашқадарё вилояти Шаҳрисабз тумани Бешкапа қишлоғидан экани ҳақида хабар берилган эди.
