55215

“МЕҲР-2”: Ироқдан 64 бола юртимизга олиб келинди. Уларнинг оналари…

Ўзбекистон 11 октябрь 9:38 669

Ўзбекистон Президенти Шавкат Мирзиёев топшириғига кўра махсус тузилган ишчи гуруҳ томонидан Ироқ ҳукумати ва UNICEF билан ҳамкорликда Ироқ ҳудудида оғир шароитда қолаётган 64 нафар бола Ўзбекистонга қайтарилди. ЎзАнинг хабар беришича, «Меҳр 2» инсонпарварлик операцияси доирасида Ўзбекистонга олиб келинган 39 нафар ўғил ва 25 нафар қиз болаларнинг орасида 14 нафар 3 ёшгача бўлган ҳамда 2 нафар ота-онасидан айрилган болалар бор.

«Ишчи гуруҳ томонидан айни пайтда турли хил халқаро террорчилик ташкилотларга аъзо бўлиб, ўзга давлатлар фуқароларининг тинчлиги ва осойишталигига таҳдид солгани учун Ироқда 10 йилдан 20 йилгача бўлган муддатларга озодликдан маҳрум этилган ёки умрбод қамоқ жазосини ўтаётган ўзбекистонлик аёллар билан тегишли суҳбатлар ўтказилган ва уларнинг фарзандларини Ўзбекистонга олиб келиш бўйича розиликлари олинган», — дейилади хабарда.

Қайд этишларича, бу аёлларнинг турмуш ўртоқларининг айримлари айни пайтда халқаро террорчилик ташкилотлари сафида қолаётган бўлса, бир қисми жанговар ҳаракатлар давомида ҳалок бўлган, қолганлари эса Ироқ ва Сурия қамоқхоналарда жазо муддатларини ўтамоқда.

Болалар соғломлаштириш муассасасига жойлаштирилиши, уларга ҳар томонлама тиббий, психологик ва ижтимоий ёрдам кўрсатилиши кўзда тутилган. Сиҳатгоҳда болалар учун иссиқ овқатлар ташкил этилиб, янги кийим-кечаклар берилади. Уларнинг шахсини тасдиқловчи ҳужжатларни расмийлаштирилади, ҳомийлар ва васийларга бириктирилади, боғча, мактабларга жойлаштирилади.

Изоҳ билдириш