46060

Хориждан қайтган шифокор ватандошимиз раҳбарлик лавозимига тайинланди

Тиббиёт 17 август 9:53 895

Камолхўжа Эшназаров Соғлиқни сақлаш вазирлигининг Хусусийлаштириш ва пуллик хизматни ташкил қилиш маркази директори лавозимига тайинланди. Бу ҳақда Соғлиқни сақлаш вазирлиги ахборот хизмати маълум қилди.

Унга, аввало, тиббиёт тизимининг ушбу йўналишида маркетинг ва менежмент бўйича инновацион ғояларни олиб кириш, пуллик хизмат кўрсатувчи даволаш муассасалари фаолиятини бугунги кун талабидан келиб чиқиб такомиллаштириш, самарадорлиги паст бўлган шифохоналарни халқаро стандартларга мос равишда модернизация қилиш ва тиббий туризмни ривожлантириш, тиббий хизмат нархларини қонунчилик талаблари асосида тартибга солиш вазифаси юклатилди. Бундан ташқари, у марказнинг молия-хўжалик стратегиясини ишлаб чиқиш, пуллик хизмат кўрсатувчи даволаш-профилактика муассасалари фаолиятини назорат қилиш, уларга ҳар жиҳатдан амалий ёрдам бериш, мазкур йўналишдаги етакчи хорижий тиббиёт муассасалари билан халқаро ҳамкорликни кенгайтириш, муваффақиятли тажрибалар ва аниқ инновацион моделларни амалиётга татбиқ этиш, тизимда замонавий ахборот технологияларини кенг жорий этиш каби устувор вазифаларга ҳам масъул эътиб белгиланди.

Таъкидлаш жоизки, тиббиёт фанлари бўйича фалсафа доктори (PhD) К.Эшназаров 8 йил давомида Жанубий Кореянинг қатор нуфузли тиббиёт компанияларида фаолият кўрсатиб, етакчи университет клиникаларида малака оширган.

Корейс ва инглиз тилларини мукаммал ўзлаштирган 41 ёшли К.Эшназаров Президентимиз Шавкат Мирзиёевнинг хориждаги ўзбекистонлик шифокорларнинг мамлакатимиз тиббиётини ривожлантиришга жалб қилиш ҳақидаги топшириғига кўра юртимизга қайтган эди.

Изоҳ билдириш