40108

Жом қишлоғига келган сел келтирган зарар миқдори маълум қилинди

Жорий йилнинг 16 майга ўтар кечаси Самарқанд вилоятига ёққан кучли ёмғир оқибатида Нуробод туманидаги Жом қишлоғида сел келиши кузатилган эди. Дастлабки ҳисоб-китобларга кўра, Жом қишлоғида селдан зарар кўрган бино ва иншоотларни қурилиш ва таъмирлаш ишларига 7 миллиард сўм маблағ талаб этилади. Бу ҳақида «Зарафшон» хабар бермоқда.

Бугунги кунда талофат кўрган хонадон ва бошқа инфратузилма объектларида қурилиш-ободонлаштириш ишлари жадал йўлга қўйилган. Талаб этиладиган маблағлар маҳаллий бюджет ва бошқа манбалар ҳисобидан қопланиши кўзда тутилган.

Ушбу қишлоқларда қурилиш, таъмирлаш ва ободонлаштириш, ижтимоий ва муҳандислик-коммуникация инфратузилмаси объектларини жорий йилнинг 1 августига қадар фойдаланишга топширилиши таъминланади.

Эслатиб ўтамиз, жорий йил 15 майдан 16 майга ўтар кечаси кучли сел келиши оқибатида 71 та, шундан 49 та Гирдиқўрғон, 10 та Жом, 7 та Тегирмонбоши ва 5 та Омондара маҳаллаларидаги аҳоли хонадонлари ва томорқаларига зарар етган эди.