26708

Ўзбекистонда илк бор кохлеар имплантация операцияси ўтказилди

Тиббиёт 18 декабрь 14:36 801

Tошкентдаги клиникалардан бирида россиялик мутахассислар ёрдамида илк бор кохлеар импалантация ўрнатиш бўйича жарроҳлик операцияси бўлиб ўтди, бу ҳақида nuz.uz хабар берди.

Эшитиш аппаратлари ожиз бўлган ҳолларда, карликнинг оғир шакли, туғма карлик учун – кохлеар имплант ўрнатиш эшитиш қобилиятини тикловчи ягона услуб десак адашмаймиз.

Кохлеар имплант – қулоқ ичига ўрнатиладиган мослама бўлиб, у ташқи микрофондан олинган товушларни кучайтириб, тўғридан тўғри инсонинг эшитиш нервларига электрон импульс шаклида етказиб беради. Имплант микрофон, батарейка, бошқарув пульти каби қисмлардан иборат бўлади.

Тошкентдаги INVIVO шифохонасида илк бор бўлиб ўтган операция “Россия аудиология ва эшитиш протезлари илмий маркази” шифокори, профессор Нели Милешина ва шифохона раҳбари Зебо Каримовлар томонидан ўтказилди.

Милешна айтишига қараганда, Тошкентда кохлеар имплантация ўрнатиш бўйича 7та опреация ўтказилган. Беморлар орасида 9 ойдан 3 ёшгача бўлган олти нафар болакай ва менингит оқибатида эшитиш қобилиятини йўқотган 32 ёшли аёл бўлган.

Зебо Каримова айтишига қараганда, охирги вақтларда Тошкентда болаларга гентамицин, канамицин, меркацин ва бошқа антибиотикларни нотўғри қўллаш оқибатида эшитиш қобилиятини йўқотиш ҳоллари кўпайган.

Дунё тажрибасида кохлеар имплант илк бор 1978 йилда ўрнатилган. Россияда биринчи имплант 1991 йилда ўрнатилган бўлсада, уни оммавийлаштириш жуда секин кечган. Масалан, 2005 йилда бор йўғи 124 нафар кишига ана шундай аппаратлар ўрнатилган. Бунга сабаб ушбу ускуналарнинг ривожланиш даражаси пастлиги ва операцияларниг қимматлиги бўлган. Лекин охирги йилларда компьютер технологиялари ривожланиши ҳамда Россияда ушбу операциялар давлат томонидан молиялаштирилиши туфайли ўтан йилда 8000 мингдан ортиқ кишига кохлеар имплант ўрнатилган. Операциянинг ўртача нархи 30-35 минг доллар.

Изоҳ билдириш