40088

Ўзбекистонга аталган 12 та чипта кимга берилиши маълум бўлди

Ўзбекистон футбол ассоциацияси ЖЧ-2018 учун ФИФА томонидан ажратилган 12 та чиптани Ўзбекистон Pepsi Суперлигасининг 12 та жамоасига биттадан тақдим этади, деб ёзади ташкилот матбуот хизмати.

ФИФА ҳамда ЖЧ-2018 мезбони Россия чипталарини адолатли сотиш механизмини ишлаб чиққан бўлиб, унга кўра бу жараён 4 та босқичда амалга оширилиши керак эди. Шундан 3 та босқич савдолаори аллақачон якунига етиб улгурган. Тўртинчи босқичда эса фақатгина омади чопган мухлисларгагина чипталар насиб қилиши мумкин.

ЎФА Халқаро футбол уюшмасига мактуб билан чиқиб, ўзбекистонлик мухлислар учун чипта ажратишни сўради. Бу борада талаб катта бўлгани учун, ФИФА ўзида бор бўлган саноқли чипталарнигина сотиши мумкин эди, дейилади хабарда.

ФИФА Англия ҳамда Бельгия термалари ўртасидаги учрашув учун 10 дона чипта тақдим этган. Учрашув 28 июнь куни Калининград шаҳрида бўлиб ўтади.

Яна 2 та чипта эса Сербия — Бразилия ўйинига бўлади. Бу ўйин 27 июнь куни Москва шаҳрида бўлиб ўтади.

Режага кўра Ўзбекистон Pepsi Суперлигасининг 12 та клубига 1 тадан чипта берилади. Клублар эса чиптани ўзининг энг фаол мухлисига тақдим этади. Ёки бўлмаса, ўша чипта лотерея орқали ўз эгасини топади. Буни клубларнинг ўзи ҳал қилади, дейилади ЎФА хабарида.

Таъкидланишича, Ўзбекистон миллий терма жамоаси Қатар мезбонлик қиладиган ЖЧ—2022 да ўйнаш ҳуқуқини қўлга кирица, ўзбекистонлик журналистларга ҳам, футбол мухлисларига ҳам катта миқдорда квоталар берилади ва бу борада муаммолар юзага келмайди.