23929

Серҳиммат спортчилар сардори CR_7

ФИФА қаторасига иккинчи марта Криштиану Роналдуни йилнинг энг яхши футболчиси сифатида эътироф этди.

Сермаҳсул ўйинлари билан таниқли футболчи «Реал» ва Португалия терма жамоасининг муваффақиятларига сезиларли улуш қўшмоқда. Шунингдек, жўшқин фаолиятидан минг-минглаб инсонлар баҳраманд бўлишмоқда.

Албатта, майдонда Роналду ўта худбин футболчи. Аммо майдон ташқарисида саховатли инсон. ЕЧЛдаги ғалабадан сўнг у ҳар бир жамоадошига баҳоси 10 000 долларлик BYL GARI соатларини совға қилди, Евро-2016 якунида Нанига ўзининг «кумуш бутса»сини туҳфа этди, агент Мендеш эса мижозининг ҳиммати эвазига хусусий орол соҳибига айланди.

Буларнинг барчаси – Криштианунинг ўз яқинларига кўрсатган мураввати. Ҳар йили Роналду­ хайрия тадбирларидан миллионлаб маблағларни аямайди. Футболчининг синглиси Катя томонидан эълон қилинган сўнгги маълумотларга кўра, Португалиядаги ўрмон ёнғинларидан жабр кўрган 370 кишига кўрсатилган тиббий муолажа Роналду ҳисобидан амалга оширилди.

Табиий офат ҳужумчининг она шаҳри – Мадейрада 50дан ортиқ кишининг ҳаётига зомин бўлганди. Португалия­лик юлдуз UNICEF, Save the Children, Қизил Xoч ва бошқа бир қатор йирик ташкилотлар билан доимий ҳамкорликда, унинг ташрифи юзлаб бемор болакайлар учун энг қувончли байрамга айланмоқда.

2004 йили Роналду Индонезия­даги кучли зилзила ва цунами оқибатида вайронага айланган Aчex вилоятини қайта тиклаш учун маблағ жамғаришда жонбозлик кўрсатди. Ўшанда мўъжиза туфайли омон қолган 6 ёшли Мартунесни ўз оталиғига олди. Руй Кошта футболкасидаги болакайни уч ҳафтадан кейин вайроналар орасидан топиб олишганди.

Криштиану унинг оиласига 40 000 евро эҳсон қилиб, болакайнинг орзусини амалга оширди – икки йил аввал Лиссабоннинг «Спортинг»и Мартунесни ёшлар жамоасига қабул қилди, Роналду 16 ёшли касбдошига уй совға қилди. Фуншал шаҳрининг тиббиёт муассасалари ҳам футболчи саховатидан баҳраманд бўлишди.

2007 йили Криштианунинг онаси кўкрак саратони туфайли шу шаҳарда жарроҳлик муолажасини олганди. Португалиядаги саратонга қарши курашиш жамияти доимий равишда ёрдам бериб келаётган Роналдуга бир неча марта миннатдорчилик эълон қилди. Саховатпеша юлдуз кўмакка муҳтож алоҳида шахсларни ҳам қўлидан келганича қўллаб келмоқда.

2012 йили у умуртқа саратони билан оғриган 9 ёшли болакайнинг мураккаб операцияси учун каттагина маблағ ажратди. 2014 йил эса ҳужумчининг чаккасида чандиқли фотосурати бутун дунёга ёйилди: айнан шундай жароҳат изи 10 ойлик чақалоқ – Эрик Ортис Круснинг миясида ўтказилган мураккаб операциядан хотира бўлиб қолганди.

Унинг ота-онаси Роналдудан аукцион учун тайёрланган футболкага имзо чекиб беришини илтимос қилишди. Футболчи эса чақалоқнинг барча муолажа харажатларини зиммасига олиб, 60 000 евро сарфлади.

Уилл Смит иштирокидаги «7 ҳаёт» сетиментал картинасига Криштиану образи жуда мос тушади. 2010 йилдан буён у лейкемияга чалинган беморларнинг доимий донори бўлиб келмоқда.

Ана шу олий жаноблик бурчини адо этиш учун ҳужумчи ўз баданини турли нақшлар билан безашдан воз кечди. Акс ҳолда, мунтазам қон топшириш имкониятидан маҳрум бўларди.

Ҳа, Криштиану – қудратли бренд. Унинг турли компания­лар билан имзолаган шартномаларидан келадиган даромадлар асосан хайрия тадбирларига сарфланади. 2016 йилда португалиялик юлдуз CR7S elfis лойиҳасини йўлга қўйди.

Унга кўра, мухлислар суюкли кумирлари билан Роналдунинг доимо янгиланиб турадиган коллекция­сидан фойдаланган ҳолда суратга тушишлари мумкин. Иловага сарфланган сармояларнинг маълум қисми Save The Children жамғармаси ҳисобига ўтади.

Футболчининг хайр-эҳсонлари ҳақидаги хабарлар тез-тез матбуотда ёритилмоқда. 2015 йили Роналду Непалдаги кучли зилзила оқибатларини бартараф этишга 7 млн. евро, авиаҳалокат туфайли ҳалок бўлган «Шапекоэнсе»­ футболчиларининг оила аъзоларига ­­3­ млн. ажратди.

Хуллас, замонанинг энг ёрқин футболчиларидан бири саховат бобида ҳам етакчилар қаторида бормоқда. Ана шу эзгу ишлари ўлароқ 2015 йили дунёнинг энг серҳиммат спортчиси сифатида эътироф этилди. Футболчи ўзига ажратилган мукофот пулларини хайрли ишларга йўналтиради.

Масалан, 2008 йили Британия таблоидидан ундирилган 165 000 доллар ҳақини Мадейранинг ривожланиш жам-ғармасига ўтказди. 2012 йили ўзининг «Олтин бутса»сини 1,5 миллионга пуллаб, маблағни Фаластиннинг Ғазо секторидаги мактабга ҳадя қилди.

2015 йили эса энг қадрли бўлган «Олтин тўп»ини (Мессининг 4 йиллик ҳукмронлигидан кейин қўлга киритилган) 600 000  фунтга сотиб, пулни бедаво хасталикка чалинган болалар шифохонаси ихтиёрига ўтказди.

Евро-2016даги чемпионлик учун ажратилган 275 минг евро саратонга чалинган болаларга ажратилди. Ўша йили ЕЧЛдаги зафар учун ажратилган 600 000 евро БМТнинг хайрия жамғармасига йўлланди.

«Қизил Хоч» – Роналду эҳсонларининг доимий мижози. «МЮ»да тўп сурган пайти Криштиану бу ташкилот ҳисобига 100 000 Швейцария франкини ўтказиб берганди. «Реал» таркибига ўтганидан кейин хайрли ишга Тони Кроссни ҳам жалб этиб, ҳар иккиси 100 000 евродан ажратишди.

«Шон-шуҳрат мени доимо таъқиб этади, бирон-бир жойга хотиржам боролмайман. Шу ҳолат баъзида жаҳлимни чиқаради. Айнан машҳурлигим туфайли хайрли ишларни амалга ошираётганимни эсласам, жаҳлимдан тушаман.

Эҳсон туфайли кимларнидир хурсанд қилиш жуда завқли, у мени тинчлантиради», – дейди Роналду. Футболчи ўз «Твиттер»ида ҳам ночорларга, жумладан Суриядаги қочоқ болакайларга алоҳида эътибор қаратмоқда:

«Инсоният ҳанузгача қашшоқлик ва очлик балосидан қутула олмагани мени таажжубга солади. Ҳар куни қанчадан-қанча болакайлар озиқ-овқат ва сувнинг танқислигидан ҳалок бўлмоқда! Бунинг давом этишига йўл қўймаслик, унга қарши курашиш керак».

Албатта, кўпчилик қатори Роналдуда ҳам ўзига яраша оила ташвишлари йўқ эмас. Криштиану – уч нафар фарзанднинг отаси, маъшуқаси Жоржина Родригес тўртинчи чақалоқни дунёга келтириш арафасида.

Бундан ташқари, футболчининг қариндош-уруғлари ҳам қўли очиқ Роналдунинг саховатидан бенасиб эмаслар. Уларнинг барчасига қўлидан келганича ёрдамини аямайди.

Хайр-эҳсон хусусида гап очилганида эса ўта камтарлик билан шундай дейди: «Яратганнинг менга берган неъмати олдида менинг эҳсонларим ҳеч нарса эмас!».

С.РАҲМОНОВ тайёрлади
Манба: www.interfutbol.uz