Португалияда мамлакат тарихидаги энг даҳшатли ўрмон ёнғинлари ҳамон давом этмоқда. Reuters агентлиги хабарига кўра, ёнғинни ўчириш учун 1 700 дан ортиқ  ўт ўчирувчилар сафарбар қилинган.

Ўтган шанба куни бошланган ўрмон ёнғинлари ҳозиргача 63 кишини ҳаётдан олиб кетган ва 135 кишига жароҳат етказган. Бу мамлакат тарихидаги энг йирик табиий офат сифатида эътироф этилмоқда. Пойтахт Лиссабон шаҳридан 200 км шимоли-шарқда жойлашган Педрогао Гранде вилоятида ўт ўчирувчилар ўрмон ёнғинларига қарши кураш олиб бормоқда.

Ёнғинни ўчириш учун Франция ва Испаниянинг ўт ўчирувчи самолёт ва махсус техникалари ҳам ёрдам бермоқда. Ўт ўчирувчиларнинг айтишича, ёнғин содир бўлаётган ҳудудларда ноқулай об-ҳаво шароити ҳукм сурмоқда. Бу эса ёнғин майдонининг янада кенгайиши мумкинлигини англатади.

Қурбонларнинг ярмидан кўпроғи ёнғиндан қочиш чоғида машиналарида қолиб ҳалок бўлишгани айтилмоқда. Уларнинг жасадлари йўл бўйларидан топилган. Улар ваҳима туфайли бошқарувни йўқотиб ҳалок бўлишгани тахмин қилинмоқда.

Ёнғинга нима сабаб бўлгани ҳозирча аниқ эмас. Полиция ўрмондаги дарахтга тушган яшин ёнғинни келтириб чиқарган бўлиши мумкинлигини тахмин қилмоқда. Ёнғин содир бўлган ҳудудда қурғоқчилик, иссиқ ҳаво оқими қуруқ шамол ҳукмронлик қилган. Маҳаллий прокуратура ёнғин бўйича жиноий иш очган.

Ҳудудининг учдан бир қисмидан кўроғини ўрмонлар ташкил қиладиган Португалияда ўрмон ёнғинларига кўпинча эътиборсизлик ёки оловдан нотўғри фойдаланиш сабаб бўлади.