4308

АҚШда Оқ уй муҳофазаси янада кучайтирилади

АҚШ ҳукумати Оқ уй муҳофазасини қайтадан кучайтиради. Президент қароргоҳининг жанубий қисмида хавфсизлик ҳудудини кенгайтиришга қарор қилинган. Оқ уйнинг жанубий қисмидаги сайёҳлар ташриф буюрадиган ва «Рождество» байрамида арча ўрнатиладиган майдонгача чўзилган сайр қилиш учун мўлжалланган ҳудуд муҳофаза остига олинади. Бу ҳақида «ТАСС» хабар берди.

Қарорнинг қабул қилинишини президентни қўриқлаш хизмати —АҚШ махфий хизмати — Оқ уй ҳудудига таклиф қилинмаган ташриф буюрувчиларнинг киришини тўхтата олмаётгани билан изоҳланди. Ўтган ойда бир неча кун ичида иккита шундай ҳодиса юз берган. Уларнинг бирида ҳудудга кирган тартиббузар 16 дақиқадан сўнг аниқланган ва қўлга олинган. Қўлга олинган шахс калифорниялик руҳий касалликка мойил ўсмир бўлиб чиққан. У ўзини президентнинг дўсти деб таништирган ва унинг ёнидан Дональд Трампга ёзилган хат топилган. Ҳодисалар юз берган вақтда президент ўз қароргоҳида бўлган.

Ҳодисадан сўнг икки нафар патруль қўриқчиси ишдан бўшатилган. Махфий хизмат вакилининг айтишича, муҳофаза кучайтирилганидан кейин ҳам, фақат узоқроқ масофадан, сайёҳлар Оқ уйнинг жанубий фасадини томоша қилиши мумкин бўлади.