2707

АҚШ Суриядаги ҳарбий базага ракета зарбаси берди

Жумага ўтар кечаси Ўртаер денгизидаги АҚШга тегишли кемалардан 59 та “Томагавк” ракетаси Суриянинг Хомс шаҳрида жойлашган “Шайрат” авиабазасига йўлланган.

Авиабазадаги бир нечта объект – учиш-қўниш йўли, самолётлар ва вертолётлар, ёқилғи қуйиш станцияси нишонга олинган.

Сешанба куни ушбу авиабазадан кўтарилган самолётлар Идлиб провинциясидаги Хон Шайхун шаҳрига зарба берган эди, ўнлаб кишиларнинг ўлимига сабаб бўлган кимёвий қуролни айнан улар қўллагани тахмин қилинмоқда.

АҚШ ҳарбий операция ҳақида бир қатор мамлакатлар, жумладан, Россияни хабардор қилган.

Суриядаги ҳарбий операция ҳақида илк хабарлар пайдо бўлиши ортида президент Дональд Трамп халққа мурожаат қилган.

“Бугун мен барча цивилизациялашган мамлакатларни Суриядаги қирғин ва қон тўкилишини тугатишга чақираман”, – деди у.

Трамнинг айтишича, кимёвий қуролнинг тарқалиши ва ундан фойдаланишнинг олдини олиш АҚШ миллий хавфсизлиги учун муҳим аҳамият касб этади.

“Суриянинг тақиқланган кимёвий қуролдан фойдаланганига шубҳа йўқ, бу билан Кимёвий қурол бўйича конвенция талабларини бажармади, БМТ Хавфсизлик Кенгаши талабини эътиборсиз қолдирди”, – деди Трамп.